మృత తవిక

మృత తవిక

--------------

భావరాజు పద్మిని - 23/12/16

చీకేసిన తాటి టెంక లా ఎండిన బ్రతుకుల్లోకి

నత్తలా పాక్కుంటూ వస్తుంది మరణం,

మన ప్రక్కనే కూర్చుని జబర్దస్త్ ప్రోగ్రాం చూస్తూ

ఛానల్ మార్చమంటూ చిక్కిశల్యమై వేడుకుంటుంది.

ఎండిన కొబ్బరిమట్టొకటి ఈడ్చుకుంటూ వస్తూ,

బండెడు పాతనల్లనోట్లున్నట్టు చతికిలపడుతుంది.

నిర్జనారణ్యంలో రుధిర ధారల జలపాతాల హోరులో,

హెడ్ ఫోన్స్ పెట్టుకు పాప(పాప్) సంగీతం వింటుంది.

పగిలిపోయిన సైకిల్ టైర్ దొర్లించుకు వస్తూ,

సగం కాలిన మొక్కజొన్నపొత్తు లాక్కుని తినేస్తుంది.

మరణంతో రణం అంత తేలికేం కాదు...

వారుణం తాగితే ఎ.టి.ఎం. పిన్ మర్చిపోరు.

చితిమంటల కోరల్లో చిక్కిన చీపురుపుల్ల

రసాయనిక శక్తి మార్పిడిలో మాడిపోయినా,

బూడిదలో మరణమృదంగం వాయిస్తుంది.

అస్తిపంజరాల సౌధంలో కపాలాల తీగమీద

ఆరేసుకున్న పాత బట్టలు చలికి ఆరి చావట్లేదు.

ఆరబెట్టుకోడం తెలీక ఆవురావురుమంటుంటే,

మళ్ళీ ఈ దిక్కుమాలిన చావు తవికలొకటా... అకటా...

దయలేని వారు మీ కవికులము వారు.

("సచ్చినాక నవ్వలేవురా..." అన్న మనసుకవి ఆచార్య ఆత్రేయ గారన్నట్టు మనకి ఊపిరున్నంత వరకే నవ్వడానికి సమయం ఉండేది. కాని, కొంతమంది కవులు మాట్లాడితే చావు, చితిమంటలు, అస్థిపంజరాలు, కళేబరాలు ... వంటివి ఎత్తి రాస్తుంటారు. దీని ద్వారా ఏం చెప్పదలచుకున్నారో కూడా తెలీదు. ఈ మృత సాహిత్యం ఎందుకో నాకు నచ్చదు. వీరికి తెలియాల్సిన విషయం ఇంకోటి ఉంది. ఈ ప్రకృతి పెద్ద అయస్కాంతం(అద్దం) వంటిది. మన మనసులోని ఆలోచనలు ఏ విధంగా ఉంటే, ఆ విధమైన జీవనాన్నే ఇది ప్రసాదిస్తుంది. అంటే, మరణాన్ని గురించి మాట్లాడితే, వద్దు బాబోయ్ అనేదాకా ఆ రుచీ చూపించి ఒదులుతుంది. అందుకే వీలైనంత తక్కువగా ఈ మాటలని వాడడం, రాయడం మంచిది. జంధ్యాల గారు అన్నట్లు ఈ క్షు.ర (క్షుద్ర రచయతలకు/రచయిత్రులకు ) ఇదే నా నజరానా ! కేవలం నవ్వుకోడానికే. వాదోపవాదాలకు బోలెడంత తీరికున్నవారు వారి గోడ మీదే ఉన్న అమ్మలక్కలతో/అయ్యలన్నలతో వాదులాడుకోమని మనవి.)

రాగంతో రోగం

రాగంతో రోగం

--------------

భావరాజు పద్మిని - 15/10/16

ఎప్పటినుంచి నిన్ను తొలిసారిగా చూసానో,

అప్పటినుంచి నీ కంట్లో ఎలాగైనా పడాలని,

మూర్చరోగిలా ఎక్కడికక్కడ దభేలున పడుతూ లేస్తూ,

తాళాల గుత్తులు పుచ్చుకుంటూ ఉన్నాను.

రెండు కిలోలు అమ్మాను, కాని నువ్వు చూడలేదే !

ఎప్పటినుంచి కిచకిచలాడే నీ మాట విన్నానో,

అప్పటినుంచి విక్స్ బిళ్ళలు డజను పట్టుకుని,

'గొంతులో కిచ్ కిచా?' అంటూ కోరింతదగ్గు వచ్చినట్టు,

నీ ధ్యాస మళ్ళించడానికి దగ్గుతూనే ఉన్నాను.

కానీ, నువ్వు నన్నసలు పట్టించుకోలేదే !

నీ పెర్ఫ్యూమ్ పరిమళం ముక్కుపుటాలకు తాకగానే,

మరే వాసనా వద్దనుకుని, మగ గాంధారిలా

ముక్కుకు స్వైన్ ఫ్లూ మాస్క్ కట్టుకు తిరుగుతున్నాను.

కానీ ఆ పెర్ఫ్యూమ్ ఏ బ్రాండ్ దో తెలీలేదే !

నువ్వు నావంక చూస్తే చాలు అదేంటో గాని

రక్తపోటు పెరిగేసి, హృద్రోగం వచ్చినవాడిలా

నా గుండె లకలకలక గీతం పాడుతుంది.

కొంపతీసి ఏమైనా బ్లాక్స్ ఉన్నాయో ఏమో ?

ఆకలి నిద్రా ఇంటి అడ్రస్ వదిలి పారిపోయాయి,

ఆంక్సైటి అన్నారు, ఏవేవో మందులిచ్చారు.

కీళ్ళరిగేలా నీవెనుక పరుగులు తీశాను

ఒక్కో మోకాలి చిప్పా మూడు లక్షలుట !

నువ్వు తప్ప లోకంలో ఏమీ కనిపించట్లేదు

4 థ్ స్టేజి ఆఫ్ హాల్యూసినేషన్ అంటున్నారు.

అసలు ఇన్ని రోగాల ప్రేమరోగానికి,

ఏ మల్టిస్పెషాలిటీ ఆసుపత్రిలో అయినా

ఎంత ఖర్చైనా చికిత్స వీలుతుందా అంట?

అందుకే ప్రేమలో పడే ముందు జాగ్రత్త కోసం

ముందస్తుగా మెడికల్ ఇన్స్యురెన్స్ చేయించుకోండి.

వీలయితే లైఫ్ ఇన్స్యురెన్స్ కూడానూ, ఏమంటారు ?

(అలా చదివి నవ్వుకుని, ఊరుకోవక్కర్లేదు... మీరు కూడా సరదాగా రాగాన్ని, రోగాన్ని కలిపి ఓ నాలుగు లైన్స్ రాయండి చెప్తా .)

నానీ, ఏమీ కహానీ ?

నాని, ఏమీ కహానీ ?

-----------------------

భావరాజు పద్మిని - 12/10/16

నాని ఎప్పుడూ ఇంతే, తవిక(కవిత)లో ఎంత క్లిష్టమైన పదాలు వాడితే అంత గొప్ప అనుకుంటాడు. మానవమాత్రులకు ఆ భాష అర్ధమవ్వాలంటే... క్లిష్టదుర్గమఅగమ్యగోచరం ! అతను రాసేవి సుమారుగా ఇలాగే ఉంటాయి, అర్ధాలు వెతికితే అనర్ధాలు జరగ్గలవ్, అలా చదివి నవ్వుకోండి అంతే !

నానీ, ఏమీ కహానీ ?

--------------------------

భావరాజు పద్మిని

12/10/16

ప్రియా,

నిర్లక్ష్య కక్షలో నికృష్ట పక్షిలా నేను ప్రచరించుచూ ఉంటే,

రహదారి వైచెడి భ్రమణగోళ యంత్రము వలె నన్ను కుదిపావు.

నిశాంతతుషారతూణీర ప్రభంజన కంజనమేదో చెలరేగినది

అంచేత, అమందానందకందుడనై వేకువలో కుక్కుటంలా కూసితిని.

మలిజాము భ్రుంగారికా కల్లోలఘీర్ణవమేదో నా అంతరంగంలో

మరణ మృదంగం మ్రోగించి, నాపై ఊకుమ్మడి దండయాత్ర చేసినదే.

తుదకు, నడికవిత సముద్రంలో నన్నొంటరిని గావించి మళ్ళినావు

డెందారోదనల వేదనలతో ఆరోహణావరోహణ మాలిక పాడుతూ

అంతరింద్రియము దిక్కుతోచక దిక్కులుపిక్కటిల్లేలా రోదించుచున్నది.

ఏమి, వత్తువా, వచ్చి నీ స్వాంత్వనాశూన్యతరంగాలలో నన్ను తేలింతువా?

చెప్పుడీ... ప్రణయమోచని, లలితధ్వంసిని, మరాళతరళవిభేదిని, రమ్మిక.

పోతపోసిన (అ)చలజీవులు

పోతపోసిన (అ)చలజీవులు

-------------------------------

భావరాజు పద్మిని - 29/8/16

పీతలోని చైతన్యం అంతా ఆవిడలోనే ఉంది. ప్రపంచంలోని నైరాశ్యం అంతా ఆవిడ ముఖారవిందంలో గోచరిస్తోంది. బెంజ్ కార్ లో వెళ్ళేవాడు సైకిల్ తొక్కేవాడిని చూసినట్టు, ముక్కు కిందకు జారిన కళ్ళజోడును పైకి తొయ్యడానికి కూడా బద్ధకిస్తూ, దాని పైనుంచి ఆవిడ చూసిన చూపులో ఆ నిర్లక్షం చూసి, "ఎందుకు పుట్టానా?" అని వాపోని వాడు ఉండడు. అసలు ఈ ప్రభుత్వ ఆఫీసులలో పనిచేసేందుకు మనుషుల్ని ప్రత్యేకంగా ఉత్పత్తి చేస్తాడేమో దేవుడు ! ఇప్పటి వరకు నేను వెళ్ళిన/చూసిన ఏ ఆఫీస్ లోనూ, కొండంత దైన్యం తప్ప, నవ్వులు, హుషారు కబుర్లు చూస్తే ఒట్టు.

" మేడం, టైం అవుతోంది, స్పీడ్ పోస్ట్ తీసుకోరా?" అడగడం అరడజనో సారి.

"కొన్ని యుగాలు ఆ జిగురు డబ్బా పక్కనే, బలిపీఠం పై తలపెట్టుకు వేచిఉండే బందీలా, కౌంటర్ పైన తలెట్టుకు పడుండలాగ... " అన్నట్టు ఓ చూపు చూసి, "వెయిట్ కర్నా పడేగా..." అంది.

సరేనని యుగాలు క్షణాల్లా గడుపుతున్నాను. గడియారం ముళ్ళు గుండె వేగంతో పాటు కదులుతున్నాయి. ఉద్యోగినమ్మ ఏవో కాగితాల లోకంలో ఉంది. ఆవిడ తలెత్తి చూడాలని, ముక్కోటి దేవతలకి ప్రార్ధన చేసుకున్నాను. అయినా, దేవుడు కరుణించినా, ఆవిడ కరుణాకటాక్ష వీక్షణాలకి ఈ అభాగ్యురాలు నోచుకోలేదు. ఇంత టైములో పక్కన అప్పుడే వచ్చిన వెన్నారొట్టా తిని బలిష్టంగా పెరిగిన ఓ శాల్తి, జీవితచరిత్ర అడక్కుండానే రాసేయ్యచ్చేమో అనిపించింది. ఆసరికి అక్కడ డబ్బాలో ఉన్న కవర్ల మీద అడ్రస్లు అన్నీబట్టీకొట్టి అప్పజేప్పేయ్యచ్చేమో అనిపించింది. మొత్తానికి అనుకున్న తరుణం ఆసన్నమయ్యింది. అమ్మ నింపాదిగా వచ్చి, గంపంత తన హ్యాండ్ బాగ్ ను తెరిచి, మృష్టాన్న భోజనం చేసిన వాడి కడుపులా ఉన్న అందులో ఏదో కుక్కగలిగింది. అప్పుడు కన్నెత్తి నన్ను చూసింది. నాకు ఆనందంతో తీన్ మార్ డాన్స్ చెయ్యాలనిపించింది. కాని, ఇక్కడ పంజాబీ డాన్స్ మాత్రమే చేస్తారు కనుక, ఆవిడ మళ్ళీ కంగారుపడి పారిపోతే, నాకళ్ళు కాచిన కాయలు, పళ్ళయ్యి, రాలిపోయి, నేలనబడి, మళ్ళీ మొలకెత్తుతాయేమో అన్న అనుమానాస్పదం వల్ల ఆగిపోయాను.

అమ్మ నింపాదిగా, కాలికింద పొరపాటున పాకే చీమలు చస్తాయేమో చూసుకుని, మనుషుల్ని తప్ప మరే ఇతర ప్రాణులలోని జీవాన్ని హరించకూడదని, చేసుకున్న తీర్మానాన్ని గుర్తుచేసుకుంటూ, వచ్చి, ఆసనమును అలంకరించి, కీ బోర్డు లాగింది. ఇంతలో ఓ అనుకోని మరో ఉపద్రవం. ఆవిడ మొబైల్ మ్రోగింది. హతోస్మి. అవతల ఆవిడ ఈవిడతో బాటు, ఈవిడ వీధి వీధందరి బాగోగులు అడుగుతోంది. ఈవిడ ఓ పది నిముషాలు మాట్లాడాకా, " అన్నట్టు, ఆంటీ, మీరు ఈ నెల పోస్టాఫీసు డిపాజిట్ కట్టారా?" అనడిగింది. "ఏమో, గుర్తులేదు," అంది అవతలి ఆంటమ్మ. ఇంతలో హీరొయిన్ పూజల ఉధృతికి బెదిరి, విఠాలాచార్య సినిమాల్లో హఠాత్తుగా పునర్జీవం పోసుకున్న నాయకుడిలా, పక్క కౌంటర్లో ఉన్న సాలభంజిక చైతన్యాన్ని సంతరించుకుని, "ఇంకా కట్టలేదు గీతా మేం..." అంది. నేను ఉలిక్కిపడి, వెన్ను తట్టుకుని, ఈ తమాషా అంతా చూస్తుండగా, సుమారు అరగంట లోపే ఆ ఊకుమ్మడి పలకరింపులు ముగిసాయి. ఈ లోపు నా దౌర్భాగ్యం వల్ల నాపక్కన ఇంకో శాల్తీ వచ్చి నిల్చున్నాడు.

"ఏంటి, ఇవాళ ఒక్క కవరేనా? ఎందుకు నా మీద ఇంత దయ చూపించావు? అన్నట్టు, నువ్వు పోస్టాఫీసు స్కీం లో చేరతానన్నావు? గుర్తుందా ?" అంటూ మొదలెట్టి, ఉన్న స్కీం లు, వాటి వడ్డీలు, చివరికి ముట్టే అసలు అన్నీ (తన కొచ్చే వాటా తప్ప) చెప్పసాగింది. అప్పుడే నా అజ్ఞానం తొలగిపోయి, ఆవిడ బాగ్ అంత లావుగా ఎందుకుందో జ్ఞానోదయం అయ్యింది. నేను దీనాతిదీనంగా... "మేడం..." అంటే...

"ఉ, ఊ, చేస్తున్నాగా... సహనం ఉండాలి. ఓర్పు ఉండాలి, లేకపోతే మీరు జీవితంలో ఏమీ సాధించలేరు," అంది. ఇక "చస్తే పోస్టాఫీసుకు వెళ్ళను, " అని ఐదొందలోసారి తీర్మానించుకుని, ఓ గంటా పదిహేను నిముషాల ఇరవై తొమ్మిది సెకన్లకు ఇంటికొచ్చి, " బుద్ధి, బుద్ధి" అనుకుంటూ, నాచెంపలు, మా అమ్మాయి ఆడుకునే బార్బీ బొమ్మల చెంపలూ అన్నీ వాయించాను. హే విశ్వచైతన్య పితా ! జడానికి, జీవానికి మధ్యస్తంగా సృష్టించిన ఈ ప్రాణుల్లో కాస్త చైతన్యం నింపవూ, ప్లీజ్..."

//రసాయనిక వంట//

//రసాయనిక వంట//

--------------------------

భావరాజు పద్మిని - 3/8/16

రసాయన శాస్త్రం చదివిన నాలాంటి వనిత అదే భాషలో వంటలు చెబితే ఎలా ఉంటుంది? ఇదిగో ఇలా ఉంటుంది.

పరిచయం:

భౌతిక చర్యలు పరివర్తనీయమైనవని మనకు తెలిసిందే. కాని, రసాయనిక చర్యలు అలాక్కాదు. వంట అనేది అపరివర్తనీయ(irreversible) రసాయనిక చర్య. ఇందులో రెండు లేక అంతకంటే ఎక్కువ సమ్మేళనాలు కలిసి చర్య జరిపి, ఉత్పన్నాలను ఇస్తాయి. వాటినే మనం తింటాము. ఆపై మనలో ఏమేమి ఉత్పత్తి అవుతాయో, వంటల్లో మీరు వాడే పదార్ధాల నిష్పత్తిని బట్టి ఉంటుంది. అన్నట్టు, ఈ రసాయనిక వంట చర్య వేగంగా జరిగేందుకు మనము ఉత్ప్రేరకాలను(catalyst) కూడా వాడవచ్చు. ఇక వంట చర్య వద్దకు వచ్చేస్తే...

లక్ష్యం :

కాకరకాయ హల్వా తయారుచేయుట

కావలసిన పదార్ధాలు:

పరీక్షనాళిక కాదు - పరీక్ష మూకుడు, సోడియం క్లోరైడ్ (దీనినే తెలుగులో ఉప్పు అందురు), మెగ్నీషియం సల్ఫేట్ (ఎప్సం సాల్ట్ - కడుపుకు ఉత్ప్రేరకం, విరేచానకారి), ముడి కాకరకాయలు(ముడి ఇనుము లాగా), పొడి చేసిన సుక్రోస్ కి రూపాంతరము (బెల్లానికి వచ్చిన తిప్పలు), ఆనిమల్ఫాట్ (నెయ్యి ) ఇత్యాదులు...

విధానము:

ముందుగా హెచ్.టు.ఓ తో ముడి కాకరకాయలను బహిర్గత చర్య జరిపించవలెను(కడగాలి అన్నమాట). అటుపై వానిని గ్రేటింగ్ చేసి, కొద్దిగా సోడియం క్లోరైడ్ కలిపి, సెంట్రీఫ్యూజ్ చెయ్యవలెను, ఆ పై ఫిల్టరేషన్ ప్రక్రియ ద్వారా ద్రావకాన్ని విడగోట్టవలెను. (తరిగి, మిక్సీ వేసి, పిండి పెట్టుకొనుటకు వచ్చిన...). అటుపై సుక్రోస్ రూపాంతర పొడి, ఎప్సం సాల్ట్ కలిపి పెట్టుకోవలెను. పరీక్ష మూకుడులో కాస్త ఆనిమల్ఫాట్ వేసి, బర్నెర్ పై హీట్ చెయ్యవలెను. అటుపై కాకరకాయ మిశ్రమాన్ని కలిపి, 15 -20 నిముషాలు ఉంచి, జరుగునవి గుడ్లప్పగించి గమనించవలెను.

పరిశీలనలు:

ముందుగా పరీక్ష మూకుడు వేడెక్కుతున్నను, అందు ఉష్ణోగ్రత పెరుగుదల ఉండదని, మేము ధర్మామీటర్ అందు పెట్టుట ద్వారా గమనించితిమి. ఇందుకు కారణము గుప్తబాష్పీకరణ శక్తి(latent heat of vaporization) . కాకరకాయ పరమాణువుల్లో ఉన్న అంతరపరమాణు బంధాలను అధిగమించే గతిశక్తి (kinetic energy) వాటికి వచ్చాకా, మనం ధర్మామీటర్ లో ఉష్ణోగ్రత పెరుగుదలను గమనించవచ్చు. అటుపై చర్య ముగిసే సరికి, ఆకుపచ్చరంగు సమ్మేళనాలు నల్లరంగు ఉత్పత్తులుగా మారుట చర్య ముగిసినది అని చెప్పుటకు చిహ్నము.

నిర్ధారణలు:

"మీ ఇంటి రసాయన వంట" కార్యక్రమంలో ఉత్పన్నాన్ని తిన్న ఆంకరమ్మ "ఇచ్చోటనే కదా !" అన్న పజ్జం పాడుకుంటూ వెళ్ళిపోయింది. ఎప్సం సాల్ట్ మహిమ ఏమగునో ఆమె మరుసటి దినము చెప్పిన తదుపరే నిర్ధారించగలము. అంచేత ఎవరి కాల్షియమ్, ఫోస్ఫోరస్, సోడియం మిశ్రమ సిరి వారిదని అందురు. ఇదియేమి అని ఆశ్చర్యపోవుచుంటిరా? ఇదియును తెలియదు, తమ సెల్ ఫోన్ లో సిమ్ము. దీనినే తెలుగులో 'దంత సిరి' అందురు.

గమనిక:

నిపుణుల పర్యవేక్షణ లేకుండా ఈ ఉత్పన్నమును ఎవరైనా గృహము నందు తయారుచేయుటకు ప్రయత్నించిన ఆపై మరుసటి దినము ఉదయమున జరుగు విపరీతములకు ప్రయోగము తెలిపిన వారు బాధ్యత వహించరు. అంచేత ముందుగా నన్ను నామినీ గా పెట్టి, భారీ మొత్తంలో ఎల్.ఐ.సి పాలసీ తీసుకుని, ఈ నూతన ఆవిష్కరణను ప్రయత్నించవలెను. ఇది చదవగా వికటించిన భావనల వలన ఇంత గొప్ప ఆవిష్కరణకు నాకు నోబెల్ బహుమతి ఇవ్వవలెనని మీకు ముచ్చట కలిగిన, కలుగవచ్చు. మొహమాటపడకుడు, ఆస్కార్ కు సైతము సిఫార్సు చేయుడు. ప్రయోగము కంచికి, మనము భవసాగారాలకి...

బుర్ర భోజనం

బుర్ర భోజనం 

-----------------

భావరాజు పద్మిని - 5/11/14

కొంతమందికి ఫుల్ స్టాప్ లు, కామా లు లేకుండా ఆపకుండా మాట్లాడే అలవాటు ఉంటుంది. అది చాట్ తో నైనా... ఫోన్ లో నైనా...నోటితో నైనా...

అలా ఏకధాటిగా మాట్లాడగల అదృష్ట జీవుల్లో మా పనమ్మాయి 'ప్రీతి 'ఒకటైతే... అది విని గిలగిల లాడే దౌర్భాగ్య జీవుల్లో నేను ఒకదాన్ని.

ఉదయం లేవగానే నా ఆలోచనలు ఇలా ఉంటాయి... త్వరగా పిల్లలకు టిఫిన్ పెట్టాలి, పాలు కలపాలి, జళ్లు వెయ్యాలి... టైం కి అన్నీ అందాలి... వాళ్ళు వెళ్ళాకా టిఫిన్లు, స్నానం, పూజ, వంట, నైవేద్యం... ఇవాళ ఎలాగైనా సరే... త్వరగా పని ముగించుకుని, ఇంటర్నెట్ లో పని చూసుకోవాలి...

ఈ లోపల ప్రీతి వచ్చేస్తుంది. నేను చూడకుండా నెమ్మదిగా పిల్లిలా వచ్చి, వెనుక నిల్చుని, నన్ను భయపెట్టాలని, తన ప్రయత్నం... అయినా చూసేస్తాను నేను... తను విఫలమౌతుంది. 'దీదీ... మీరు వెనుక కూడా ఎలా చూస్తారు ?' అంటుంది... అదంతేలే... అంటాను.

ఇక నా బుర్ర మీద మాటల దాడి మొదలు... "దీదీ... మేరి భాభి కా భాంజి హైనా... " అంటుంటే... ఈ ఇన్ఫర్మేషన్ నీకు అవసరమా... అని మందలించి, బుర్ర వెంటనే అప్రమత్తమై నా చెవులు సగం మూసేస్తుంది. యాంత్రికంగా 'ఉ' కొడతాను. ఏ వెట్ గ్రైండర్ లోనో పిండి వేస్తుంటాను... మళ్ళి మొదలు... "దీదీ ఏ నీచే కా పత్థర్ ఘూం రహి హై... ఫిర్ అందర్ కా భి క్యూ ఘుమ్తా హై..." చిన్నగా నవ్వుకుని... ఐసా హాయ్ ఇడ్లీ కా ఆటా బన్ తా హై... అంటాను.

                             

ఏ పడగ్గదిలోనో పక్క సర్దుతూ ఉంటాను... ' దీదీ, రాత్ భర్ మై సోయీ నహిన్... ' అంటూ ఆపుతుంది. 'క్యూన్... క్యా హువా...' అంటే... ' దేఖో... కూలర్ మే తో హమ్ పాని డాలతే హై... హా... ఫిర్ ఏ.సి. మే తో డాలతే నహిన్ హై ? వహన్ సే పాని కైసే నిక్లేగా ?' మళ్ళి, నవ్వి... ' ఏ .సి మే పాని బనానే కా మెషిన్ హోతా హై... ' అంటాను.

ఈ లోపు తను ఇల్లుచిమ్మి, తడిబట్ట పెట్టేందుకు వచ్చింది...' దీదీ... ఏ ధర్మామీటర్ సే క్యా కర్ రహే హో...' అంటుంది. నేను కలవరంగా చుట్టుపక్కల చూసి... 'క్యా కహా...' అన్నాను. అప్పుడు నా ముందున్న వస్తువును చూపి, ' ఏ నా ఊపర్ వాలే అంకుల్ కే పాస్ భి హై... ' అంటుంది. అప్పుడు అర్ధమై... మనసులో బుర్ర బాదుకుని, ' ఇస్కో ప్రింటర్ కహతే హై... ధర్మామీటర్ బుఖార్ ఆనే పర్ డాక్టర్ మూ మే లగాతే హై నా... వో హై...' అంటాను. 'అచ్చా...' అంటుంది.

ఏ వస్తువుని అయినా ఎక్కువగా తినేస్తే ఏమౌతుంది... ఇదిగో... ఫైనల్ గా ఇదే అవుతుంది...

'దీదీ సాబున్ కిధర్ హై...'
' ఫ్రిజ్ మే రఖా హై...'

'పద్మినీ, పచ్చిమిరపకాయలు ఎక్కడున్నాయ్... ' అడుగుతారు మా అత్తగారు.
'పాల ప్యాకెట్ లో ఉన్నాయండీ...' అనేసి, నాలుక కొరుక్కుని... 'పాల ప్యాకెట్ పక్కన ఉన్నాయండి...' అంటాను.

వంకాయ పచ్చడి నూరుతుంటే వచ్చింది... 'దీదీ ఏ కైసే బనాతే హై...'
' ఇస్కో నా పెహ్లే seo కర్నా హై.'
ఛి, ఛి... మనసులో సైట్ కు చెయ్యాల్సిన seo ఆలోచన ఇలా వంకాయ పచ్చడిలో పడిందా... ఇక లాభం లేదు... అని తీర్మానించుకుని... శరణాగతి వేడాను.
'దేఖో... హమే బహుత్ కాం హై. అభి ఆప్ కిత్నా భి బోలో... హమరే దిమాక్ మే నహి జాయేగా. బాద్ మే బతానా ... "
పాపం, అప్పటినుంచి, తను ఏది మొదలెట్టినా... పై వాక్యమే... రిపీట్... లేకపోతే, ఈ చండివనంలో లేడీ ఘజిని ఉందని, మీరంతా నవ్వి పోరూ ! ఆ !

నిద్దర్లో జ్ఞానోదయం

నిద్దర్లో జ్ఞానోదయం 

-----------------------

భావరాజు పద్మిని - 28/10/2014

"అమ్మా ఊర్మిళా దేవి, నిద్ర లే !"
"ఎవరది, నా పేరు ఊర్మిళ కాదు, పద్మిని... అయినా నిద్ర పోతున్నవాళ్ళు దేవుడితో సమానం. నిద్ర లేపితే పాపం వస్తుంది..."
"అది మనుషులు లేపితే కదా ! ఇదిగో నేను నీ అంతరాత్మని వచ్చాను... లేచి చూడు..."
"వేళాపాళా లేకుండా ఇప్పుడు ఎందుకొచ్చావ్ ? అసలే నిన్న నాగులచవితి ఉపవాసం చేసి, నీరసంగా ఇప్పుడే పడుకున్నా..."
"నిన్న ఉదయం నుంచి నీ కాకిగోల అంతా చూస్తున్నా... నీకు కాస్త జ్ఞానం ప్రసాదించడం తప్పనిసరి అనిపించింది... లే చెప్తా..."
"మొదలెట్టు..."
________________________________

1 )
"చిన్నప్పుడు జనరంజని కార్యక్రమం విన్నావా ?"
"ఓ, మధుర గీతలు తక్కువ ... విషాద గీతాలు ఎక్కువ. జీవితంలో దెబ్బతిన్న వాళ్ళు... పాడు జీవితమోయి... కనుపాప కరువైన... లాంటి పాటలు అడిగేవారు."
"అందులో చదివే పేర్లు ఎలా ఉంటాయి ?"
"శ్రీకాకుళం జిల్లా కొత్తపెంట గ్రామం నుంచి ... అప్పలమ్మ, సుబ్బాయమ్మ, వెంకమ్మ, నరసమ్మ, సీత, గీత, రాత, పీత... మరియు విస్సన్నపేట నుంచి రాముడు, భీముడు, కాముడు, సోముడు, అప్పడు... ఇంకా ఇతర మిత్రులు కోరుతున్నారు... " అని చదివేవారు."
"అంటే... పీత కూడా నిజంగా ఉంటుందంటావా ? లేక ద్విత్వాక్షరాల్లా వీళ్ళంతా ఒక్క చోట చేరి, ఉత్తరాలు రాస్తారంటావా ?"
"లేదు, పీత ఉండదు. నాకు ఇదంతా ఉత్తరాలు రాసేవాళ్ళ 'ప్రాస కోసం ప్రయాస', అనిపిస్తుంది "
"కదా ! అలాగే ఉండు. ఇప్పుడు మరో ప్రశ్న..."

_______________________________________________________

2)
"నీకు ఆకాశరామన్న తెలుసా ?"
"ఓ, తెలియకేం... ఇదివరకు మారుపేరుతో ఆకాశరామన్న, పాతాళ సీతమ్మ, శ్రేయోభిలాషి అని ఉత్తరాలు వచ్చేవి. ఏవైనా వ్యవహారాలు చెడగోట్టాలంటే, తడికె చాటున నక్కి, ఉచిత సలహాలు ఇవ్వాలంటే, ధైర్యం లేని వాళ్ళు ఇలా చేసేవారు. అంతే కాదు, మరి కొన్నాళ్ళకి బ్లాంక్ కాల్స్, రాంగ్ కాల్స్ కూడా వచ్చేవి. నోట్లో కిళ్ళీ వేసుకుని, తమ గొంతు ఇతరులు గుర్తు పట్టకుండా మాట్లాడేవాళ్ళు ! తర్వాత సెల్ ఫోన్లు వచ్చాకా ఆ పప్పులు ఉడకలేదనుకో!"
"భేష్, నీకు చాలా విజ్ఞానం ఉంది. అంటే... ఏ చింతా లేకుండా పని జరిపించుకోడానికి ఇదొక పధ్ధతి అన్నమాట ! ఇప్పుడు మూడో ప్రశ్న !"

_______________________________________________________

                                        

3)
"ఘోస్ట్ రైటర్ " అన్న పేరు విన్నావా ?
"వినకేం, చేతులు కళ్ళు తిరిగిపోయిన రచయతలు, రాసి, రాసి, చచ్చాకా కూడా అలవాటు కొద్దీ పుస్తకాలు రాసేస్తారేమో అనుకుని భయపడేదాన్ని. తర్వాతే తెలిసింది... పాపం డబ్బు లేని గొప్ప రచయతల్ని, డబ్బిచ్చుకు కొట్టి, రాయించుకునే రచనల్ని అలా అంటారని. ఇదంతా సోమ్మొకడిదీ... దానితో కొనుక్కునే సోకు కూడా అతడిదే..." అన్నట్లు ఉంటుంది.
"ఇక చివరాఖరి ప్రశ్న ! ఫేస్ బుక్ లో ఫేక్ ఐడి సృష్టించుకోవడం కష్టమా ?"
"అబ్బే,బండర్లడ్డు తిన్నంత సులువు. కాసిన్ని ఈమెయిలు లు సృష్టించి, కాసిన్ని ఫేక్ ప్రొఫైల్స్ సృష్టించడమే ! "
"అగ్గదీ సంగతి ! తెలుసు కదా ! మరెందుకు లైక్ లకు, కామెంట్ లకు ఏడుస్తావ్. పత్రిక కంటెంట్, బొమ్మలు, ఆడ్స్ సంపాదించడం కష్టం. ఈ పని చాలా వీజీ ! ఎవరో వస్తారని, కామెంట్స్ పెడతారని ఎదురుచూసే బదులు... ఇంత కష్టపడ్డాకా, ఆ కాస్త కూడా నువ్వే కానివచ్చుగా ! "
"నేను ఇలా ఎప్పుడూ చెయ్యలేదు."
"ఓసి ఆండాళ్ళు ! ఇది అన్ని పత్రికలూ చేసేదే ! ఇంటరాక్టివ్ గా ఉండాలని పజిల్స్, సింగల్ పేజీ కధలు, అభిప్రాయాలు, లేఖలు, బొమ్మకు కధలు...అలాంటివి పెట్టి అంతా బొప్పి కట్టించుకుని, చివరికి వాళ్ళకి వాళ్ళే వనజ, జలజ, శైలజ పేర్లతో రాసేసుకుని, అచ్చేసుకు వదిలేసారు.... వదిలేస్తున్నారు. ఇది కూడా తప్పదోయ్..."
"అలాగా... నాకు ఇప్పుడు లైటు వెలిగింది . నాకే కాదు, ఈ పోస్ట్ చదువుతున్న ఇతర పత్రికల వాళ్లకి కూడా అర్ధమయ్యింది. థాంక్స్ అంతరాత్మ కృష్ణ పరమాత్మ ! నీకోసం ఒక పద్యం చెబుతా !

అడిగిన కామెంటియ్యని పదుగురు
మనుజులను వేడి వగచుట కంటెన్
సడి సేయక పది ఫేక్ బుక్కుల
సృష్టించి కొనసాగించగ పాడియె సుమతీ !

(ఈ పోస్ట్ సరదాగా నవ్వుకోవడానికే. నిన్నటి నుంచి నిరవధికంగా పత్రికకు ప్రోత్సాహం అందిస్తున్న మిత్రులకు కృతజ్ఞతాభివందనాలు )

నిద్దర్లో జ్ఞానోదయం 

-----------------------

"అమ్మా ఊర్మిళా దేవి, నిద్ర లే !"
"ఎవరది, నా పేరు ఊర్మిళ కాదు, పద్మిని... అయినా నిద్ర పోతున్నవాళ్ళు దేవుడితో సమానం. నిద్ర లేపితే పాపం వస్తుంది..."
"అది మనుషులు లేపితే కదా ! ఇదిగో నేను నీ అంతరాత్మని వచ్చాను... లేచి చూడు..."
"వేళాపాళా లేకుండా ఇప్పుడు ఎందుకొచ్చావ్ ? అసలే నిన్న నాగులచవితి ఉపవాసం చేసి, నీరసంగా ఇప్పుడే పడుకున్నా..."
"నిన్న ఉదయం నుంచి నీ కాకిగోల అంతా చూస్తున్నా... నీకు కాస్త జ్ఞానం ప్రసాదించడం తప్పనిసరి అనిపించింది... లే చెప్తా..."
"మొదలెట్టు..."
________________________________

1 )
"చిన్నప్పుడు జనరంజని కార్యక్రమం విన్నావా ?"
"ఓ, మధుర గీతలు తక్కువ ... విషాద గీతాలు ఎక్కువ. జీవితంలో దెబ్బతిన్న వాళ్ళు... పాడు జీవితమోయి... కనుపాప కరువైన... లాంటి పాటలు అడిగేవారు."
"అందులో చదివే పేర్లు ఎలా ఉంటాయి ?"
"శ్రీకాకుళం జిల్లా కొత్తపెంట గ్రామం నుంచి ... అప్పలమ్మ, సుబ్బాయమ్మ, వెంకమ్మ, నరసమ్మ, సీత, గీత, రాత, పీత... మరియు విస్సన్నపేట నుంచి రాముడు, భీముడు, కాముడు, సోముడు, అప్పడు... ఇంకా ఇతర మిత్రులు కోరుతున్నారు... " అని చదివేవారు."
"అంటే... పీత కూడా నిజంగా ఉంటుందంటావా ? లేక ద్విత్వాక్షరాల్లా వీళ్ళంతా ఒక్క చోట చేరి, ఉత్తరాలు రాస్తారంటావా ?"
"లేదు, పీత ఉండదు. నాకు ఇదంతా ఉత్తరాలు రాసేవాళ్ళ 'ప్రాస కోసం ప్రయాస', అనిపిస్తుంది "
"కదా ! అలాగే ఉండు. ఇప్పుడు మరో ప్రశ్న..."

_______________________________________________________

2)
"నీకు ఆకాశరామన్న తెలుసా ?"
"ఓ, తెలియకేం... ఇదివరకు మారుపేరుతో ఆకాశరామన్న, పాతాళ సీతమ్మ, శ్రేయోభిలాషి అని ఉత్తరాలు వచ్చేవి. ఏవైనా వ్యవహారాలు చెడగోట్టాలంటే, తడికె చాటున నక్కి, ఉచిత సలహాలు ఇవ్వాలంటే, ధైర్యం లేని వాళ్ళు ఇలా చేసేవారు. అంతే కాదు, మరి కొన్నాళ్ళకి బ్లాంక్ కాల్స్, రాంగ్ కాల్స్ కూడా వచ్చేవి. నోట్లో కిళ్ళీ వేసుకుని, తమ గొంతు ఇతరులు గుర్తు పట్టకుండా మాట్లాడేవాళ్ళు ! తర్వాత సెల్ ఫోన్లు వచ్చాకా ఆ పప్పులు ఉడకలేదనుకో!"
"భేష్, నీకు చాలా విజ్ఞానం ఉంది. అంటే... ఏ చింతా లేకుండా పని జరిపించుకోడానికి ఇదొక పధ్ధతి అన్నమాట ! ఇప్పుడు మూడో ప్రశ్న !"

_______________________________________________________

3)
"ఘోస్ట్ రైటర్ " అన్న పేరు విన్నావా ?
"వినకేం, చేతులు కళ్ళు తిరిగిపోయిన రచయతలు, రాసి, రాసి, చచ్చాకా కూడా అలవాటు కొద్దీ పుస్తకాలు రాసేస్తారేమో అనుకుని భయపడేదాన్ని. తర్వాతే తెలిసింది... పాపం డబ్బు లేని గొప్ప రచయతల్ని, డబ్బిచ్చుకు కొట్టి, రాయించుకునే రచనల్ని అలా అంటారని. ఇదంతా సోమ్మొకడిదీ... దానితో కొనుక్కునే సోకు కూడా అతడిదే..." అన్నట్లు ఉంటుంది.
"ఇక చివరాఖరి ప్రశ్న ! ఫేస్ బుక్ లో ఫేక్ ఐడి సృష్టించుకోవడం కష్టమా ?"
"అబ్బే,బండర్లడ్డు తిన్నంత సులువు. కాసిన్ని ఈమెయిలు లు సృష్టించి, కాసిన్ని ఫేక్ ప్రొఫైల్స్ సృష్టించడమే ! "
"అగ్గదీ సంగతి ! తెలుసు కదా ! మరెందుకు లైక్ లకు, కామెంట్ లకు ఏడుస్తావ్. పత్రిక కంటెంట్, బొమ్మలు, ఆడ్స్ సంపాదించడం కష్టం. ఈ పని చాలా వీజీ ! ఎవరో వస్తారని, కామెంట్స్ పెడతారని ఎదురుచూసే బదులు... ఇంత కష్టపడ్డాకా, ఆ కాస్త కూడా నువ్వే కానివచ్చుగా ! "
"నేను ఇలా ఎప్పుడూ చెయ్యలేదు."
"ఓసి ఆండాళ్ళు ! ఇది అన్ని పత్రికలూ చేసేదే ! ఇంటరాక్టివ్ గా ఉండాలని పజిల్స్, సింగల్ పేజీ కధలు, అభిప్రాయాలు, లేఖలు, బొమ్మకు కధలు...అలాంటివి పెట్టి అంతా బొప్పి కట్టించుకుని, చివరికి వాళ్ళకి వాళ్ళే వనజ, జలజ, శైలజ పేర్లతో రాసేసుకుని, అచ్చేసుకు వదిలేసారు.... వదిలేస్తున్నారు. ఇది కూడా తప్పదోయ్..."
"అలాగా... నాకు ఇప్పుడు లైటు వెలిగింది . నాకే కాదు, ఈ పోస్ట్ చదువుతున్న ఇతర పత్రికల వాళ్లకి కూడా అర్ధమయ్యింది. థాంక్స్ అంతరాత్మ కృష్ణ పరమాత్మ ! నీకోసం ఒక పద్యం చెబుతా !

అడిగిన కామెంటియ్యని పదుగురు
మనుజులను వేడి వగచుట కంటెన్
సడి సేయక పది ఫేక్ బుక్కుల
సృష్టించి కొనసాగించగ పాడియె సుమతీ !

(ఈ పోస్ట్ సరదాగా నవ్వుకోవడానికే. నిన్నటి నుంచి నిరవధికంగా పత్రికకు ప్రోత్సాహం అందిస్తున్న మిత్రులకు కృతజ్ఞతాభివందనాలు )

ధభేలు కవితలు

ధభేలు కవితలు 

----------------

11/10/15

(కంగారడకండి ... కొత్త కవితా ప్రక్రియ, నిన్నే కనిపెట్టా... అంటే, చదవంగానే ఘభాల్న ఘాబరా వేసి, దభేలున పడిపోతారు, జస్ట్ అంతే అన్నమాట )

చనువిచ్చాను కదా అని నెత్తెక్కకు - అట్టే జుట్టు లేదు, జారి కింద పడతావు.

తక్కువ అంచనా వెయ్యకు - అరటి తొక్కనీ, సబ్బు ముక్కనీ - కాలేసావో, కైవల్యానికే !

చూడు, ఒక్కవైపే చూడు, రెండో వైపు చూడకు - తట్టుకోలేవు - సెల్లో టేప్ వేసి అతికిన వెయ్యి నోటుని.

ఎప్పుడూ వానొస్తుందనే అనుకుంటాయేమో, అసలు గొడుగే ముయ్యవు - పుట్టగొడుగులు.

గుండ్రాయిలా ఉన్నావు ఏదైనా పనిచేసుకోవచ్చుగా అనకు - గుండ్రాయి ఎక్కడైనా పని చేస్తుందా ?

ఎవరర్రా కదిలే కాలమా కాసేపు ఆగమని పాట పాడింది ? - నా రిస్టు వాచీ అది విని ఆగిపోయింది, పైసల్ దియ్యుండ్రి.

ఒక్కొక్కడిని కాదు షేర్ ఖాన్, వంద ఒకేసారి పంపు - ఫేస్ బుక్ లో, అన్నీ షేర్ చేసేస్తా.

మీ ఇంటికొస్తుంది, నట్టింటి కొస్తుంది, వంటింటి కొస్తుంది - కరెంటు.

                                     

(చదివి నవ్విన ప్రతీ వాళ్ళు, తప్పనిసరిగా, కాస్త మెదడుకు పదును పెట్టి, ఒక ధభేలు కవిత వాయినంగా ఇవ్వాలి. లేకపోతే, టీవీ లో ఐదేళ్ళ పాటు సాగే జిడ్డు సీరియల్ మొత్తం ఓపిగ్గా కూర్చుని, చూసినంత పాపం అంటుతుంది.)

స్నాన విలాపం

స్నాన విలాపం 

----------------

భావరాజు పద్మిని - 11 /10/15.

(గమనిక : కేవలం హాస్యం కోసమేనని సవినయ మనవి. )

నేనొక నీళ్ళతొట్టి కడ నిల్చి, తటాలున టాపు తిప్పి 

మగ్గానెడు నంతలోన నీళ్ళన్నియు జాలిగ

నోళ్ళు విప్పి మా ప్రాణము తీతువాయనుచు

బావురుమన్నవి కృంగిపోతి నా

మానసమందేదో తళుకు మన్నది స్నానవిలాప కావ్యమై

అంతలో ఒక నీటిచుక్కకన్నె సన్నని

గొంతుకతో నన్ను చూసి యిలా అంది ప్రభు

ఎక్కడో వానచినుకై ప్రభవింతుము మబ్బుజారి 

మన్నుమింగకున్న మరియొక చినుకుతోను కలిసి 

బొట్టుగ జట్టుగ ధారగ మారి 

కొండల దారిని చీల్చుకు వత్తుమోయి

ధార ధారతో కలిసి జలపాతమవ్వునోయి 

జలపాతము ముందుకు సాగి ప్రవాహమవ్వునోయి 

అది తిరిగి కాలువై నదిలోకి కాలుమోపునోయి 

నది పెరిగి, తరిగి, తిరిగి వొరవడిని వచ్చునోయి

అమ్మ నదిలోని బిందువనుచు మురియునంతలోన 

బండ పైపొకటి మోటార్ పెట్టి పీల్చి లాగిరోయి 

ఓవర్ హెడ్డు టాంకులోకి మమ్ము తోసిరోయి 

క్లోరిన్, రిన్ కలిపి మా ఉసురు తీసిరోయి

కొనఊపిరితో కొట్టుకొనుచున్న మమ్ముజూచి 

జాలియన్నది నసలు జెందక మరల తిరిగి 

పైప్ లైన్ పంపుల నుండి పంపి పంపి 

మీ ఇంటి టాంకు లోకి మమ్ము తోసిరోయి

పాపం మీరు దయాదాక్షిణ్యాలుగల మానవులు కావోలునే

ఎందుకమ్మా మా స్వేచ్చ జీవనానికి అడ్డు వస్తావు

మేము నీకేం అపకారము చేసాము ???

మా వెలలేని ముగ్ధసుకుమార స్వచ్ఛ మాధురీ

జెవితమెల్ల మీకయి త్యజించి కృశించి నశించిపోయే

మా జీవమెల్ల కొల్లగొని ఆపై మగ్గుతోడ మురికిన చిమ్మి

మమావల పారబోతురుగదా నరజాతికి నీతియున్నదా

:వోసీ మానవీ !!!

బుద్ధదేవుని భూమిలో పుట్టినావు

సహజమంగు ప్రేమ నీలోన చచ్చ్చేనేమి

అందమును హత్య చేసి తళుకులిడు హంతకీ 

మైలపడిపోయెనోయి నీ మనుజ జన్మ

అని దూషించు నీటి బిందువుల స్నాన మాడలేక

వట్టిచేతులతో వచ్చినాను ఇటుల నేను 

మీరునూ స్నానము త్యజియించి 

నికపై పాడుకొనుము ఈ గేయమును.

ఫలశృతి : ఈ గేయమును చదివిన వాళ్ళు తప్పనిసరిగా 3 రోజులు స్నానం మానెయ్యాలి. లేకపోతే చీర మహా పాతకాలు చుట్టుకుని, వచ్చే జన్మలో నీళ్ళు దొరకని ఏ చెన్నై లోనో, హైదరాబాద్ లోనో పుడతారు, ఉత్తుత్తినే.

మాయదారి సవితి

మాయదారి సవితి 

------------------------

భావరాజు పద్మిని-11/3/16

కొత్త చీర కట్టి, మగని కళ్ళెదుట తిరిగినా,

కన్నుతిప్పనీదు కనికట్టు సవితి.

గాజులు, అందెలు సందళ్ళు చేసినా,

చెవులకెక్కనీదు చుప్పనాతి సవితి.

చంద్రవంక మోమున నెలవంక నవ్వులు,

చూడనియ్యదమ్మ నెరజాణ సవితి.

వాలుజడ మాలికల వలపువల వేసినా,

తనపట్టు వదలనే వదలదే వగలాడి సవితి.

ఊసులాడబోతే "ఊ" కొట్టుటే కాని,

వివరమే విననీదు వగరు సవితి.

ఏం మాయ చేసెనో మాయదారి సవతి,

సతులెల్ల పతిధ్యాసకై పాట్లు పడుచుండ,

మీకన్ననేమిన్న చూడుమనుచు,

కొంటెగా నవ్వునే తుంటరి సవితి.

"నీ ఛార్జి డిశ్చార్జి కాను" అన్న శాపాలు

"రీచార్జి" యగుచు విని నవ్వుకోనునేకాని,

కడగంటి చూపైనా దక్కనీయదమ్మ...

టక్కరి గాలమేయు మొబైల్ సవతి.

( జీవితసమస్య చూస్తున్నట్లు, గుడ్లప్పగించి, మొబైల్ లో వచ్చే ప్రతి వీడియోను తదేకంగా చూస్తూ, సతుల్ని పట్టించుకోని పతులకు(అలాగే పతుల్ని వెయిట్ లిస్టులో పెట్టే సతులకు)... చిన్నసతుల మానసావిష్కరణ... భక్తితో అంకితం.)