తూచ్ పజ్యాలు

తూచ్ పజ్యాలు (సరదాగా నవ్వుకోడానికే నండోయ్ )

---------------------------------------------------------

- భావరాజు పద్మిని 

అయ్యలారా ! అమ్మలారా ! ఇవాళే ఒక కొత్త పజ్జ ప్రక్రియ కనిపెట్టేను. రవ్వలు, చువ్వలు, అజ్నానీలు లాగా... ఇదికూడా వెరైటీ అన్నమాట ! 'ఆటవిక అట్ట ప్రవేశంలో' (wild card entry) నా ఈ ప్రక్రియ తెలుగు ఛందస్సు లో దొడ్డి దారిలో చేరాలంటే, మీరంతా ఈ ప్రక్రియ మీకు నచ్చితే... 'భళా !' అని 100 నెంబర్ కి, నచ్చకపోతే 'అంతా అయిపొయింది' అని 108 నెంబర్ కి sms పంపగలరు.

తూచ్ పజ్యం 
-------------
మాచ్ ఆడుతున్న క్రీడాకారుడు
హాచ్ అనుచు తుమ్మి అపశకునమనుచు
తూచ్ అని బయల్పడెన్ అదిగని
కోచ్ లబోదిబోమనగ ఆట గోవిందాయెన్

హా, ఇప్పుడు ఈ పజ్జ ప్రక్రియ గురించి, ముఖ్యంగా ఛాందసులు అయిన పెద్దవాళ్ళకి చెప్పాలి. వేదాంతం పెకారం నిజానికి మనం చూసేది అంతా తూచ్... అంటే మిధ్య. అందుకే ఈ పేరేట్టాను. ఇందులో ప్రతి పాదంలోనూ రెండో అచ్చరం 'చ్' రావాలి. యతి నియమం, అక్షర నియతి లేవు. కొన్ని అన్యభాషా పదాలు కలిసిన ఈ పజ్జ ప్రక్రియను పెనుప్రమాదం(మణిప్రవాళం ) అంటారు. మీరూ ప్రయత్నించండి , వోట్ చెయ్యడం మరువకండి.